Pilula hauen helburua kirolarekin zuzeneko harremana dutenei euskaraz jarduteko baliabideak ematea da. Eta, kasu honetan, luzaketen inguruko zenbait gako eskaintzea.

Jarduera fisiko gehienetan, intentsitate handikoetan behintzat, ezinbestekoa da berotzea. Luzaketak ez dira salbuespena. Kirol munduan badago joera bat: luzaketa-ariketak eta beroketa-ariketak nahastea. Kirolaren munduan oso ohikoa da norbait berotzen ari dela entzutea luzatzen ari denean. Lehenengo berotu eta gero luzatu egin behar da. Berotze orokorrak — beste onura batzuen artean — odol-fluxua areagotzen du eta gorputzeko tenperatura igotzen du; bi efektuak mesedegarriak dira ariketa fisikoa egiteko. Gainera, berotze espezifikoari esker, odol gehiago bideratzen da luzatu behar diren ehunetara; ondorioz, ehun horiek elikatu eta oxigenatu egiten dira.