Emozioek, bizitzan bezala, eragin handia dute kirolean ere; kirol-errendimenduari eta ongizate psikologiko eta fisikoari eragiten diete. Kirolean bizitzen ditugun egoera, lehia edo bizipenek emozioetan eragiten digute etengabe eta banakako esperientzia emozionalak moldatzen dizkigute.
Kirolari, entrenatzaile edo guraso bakoitzak, hau da, gutako banako bakoitzak modu desberdinean bizi dugu kirola, eta, ondorioz, emozio eta esperientzia emozional desberdinak izaten ditugu egoera beraren aurrean.
Hori dela eta, kirolak sorrarazten dizkigun emozioen inguruan banakako hausnarketak egitea beharrezkoa izango da gutako bakoitzarengan zein emozio sortzen dizkigun jakiteko eta emozio horiek gure errendimendu eta ongizatean nolako eragina duten ezagutzeko.
Emozioen inguruko lehenengo pilula honetan, oinarrizko 3 kontzeptu landuko ditugu: Emozioak, gogo-aldarteak eta esperientzia emozionalak.